احسان اللہ کی انجری کا معاملہ: ڈائریکٹر پی سی بی میڈیکل اینڈ اسپورٹس سائنسز مستعفی

پاکستانی فاسٹ بولر احسان اللّٰہ کی انجری کے معاملے پر پاکستان کرکٹ بورڈ (پی سی بی) کے ڈائریکٹر میڈیکل اینڈ اسپورٹس سائنسز ڈاکٹر سہیل سلیم مستعفی ہوگئے۔

ڈائریکٹر میڈیکل اینڈ اسپورٹس سائنسز پی سی بی ڈاکٹر سہیل سلیم نے استعفیٰ چیئرمین پی سی بی محسن نقوی کو بھیج دیا۔

ذرائع کا کہنا تھا کہ چیئرمین پی سی بی نے کھلاڑیوں کے انجریز کے معاملے پر تحقیقاتی کمیٹی قائم کی تھی۔

ذرائع کا کہنا ہے کہ پی سی بی میڈیکل پینل پر احسان اللّٰہ کی انجری کو غیر ذمہ دارانہ طریقے سے ہینڈل کرنے کا الزام تھا، کھلاڑیوں کی انجریز پر آج چیئرمین پی سی بی محسن نقوی کو میڈیکل بورڈ کی رپورٹ موصول ہوئی تھی۔

محسن نقوی کو احسان اللّٰہ، ارشد اقبال، ذیشان ضمیر اور شوال ذوالفقار کی میڈیکل رپورٹس موصول ہوئیں۔

اس سے قبل محسن نقوی کا کہنا تھا کہ میڈیکل کمیٹی سے تمام رپورٹس موصول ہو گئی ہیں، رپورٹس کا جائزہ لے کر جلد تفصیلات سامنے لائیں گے۔

ان کا کہنا تھا کہ پروفیسر ڈاکٹر جاوید اکرم، ڈاکٹر رانا دلاویز اور پروفیسر ڈاکٹر ممریز کا دس دن میں رپورٹس مرتب کرنے پر شکریہ ادا کرتا ہوں۔