چیمپئنز ٹرافی ہوگی اور پاکستان میں ہی ہوگی: محسن نقوی

رپورٹ: فیضان لاکھانی۔۔۔ پاکستان کرکٹ بورڈ (پی سی بی) کے چیئرمین محسن نقوی کا کہنا ہے کہ چیمپئنز ٹرافی ہوگی اور پاکستان میں ہی ہوگی، تمام آٹھ ٹیمیں ایونٹ میں شرکت کریں گی ، ایسا کیوں سوچنا کہ بھارت نہیں آئے گی۔

کراچی میں میڈیا سے گفتگو میں انہوں نے کہا کہ چیمپئنز ٹرافی کیلئے پاکستان کی تیاریاں بھرپور انداز میں جاری ہے ، ایک لمحے کیلئے بھی اس میں ٹہراو نہیں آئے گا، پہلے وینیوز کا جائزہ لینے کو آنے والا وفد بھی مطمئن رہا تھا اور اب پچ کنسلٹنٹ بھی پاکستان آرہے ہیں ۔

ایک سوال پر انہوں نے کہا کہ اگر انڈیا کا میڈیا چیمپئنز ٹرافی پر پروپگینڈا کررہا ہے تو آپ کیوں نہیں کررہے ، پاکستان نے آئی سی سی کو چیمپئنز ٹرافی کا مجوزہ شیڈول دے دیا ہے ۔ چیئرمین پی سی بی نے اسٹیڈیمز کی اپ گریڈیشن پر بھی زور دیا اور عہد ظاہر کیا کہ یہ سارا کام چیمپئنز ٹرافی سے قبل کرنا پڑے گا چاہے دن رات یہی بیٹھنا پڑ جائے ۔

انہوں نے اسٹیڈیم کے میڈیا باکس میں صحافیوں سے غیر رسمی بات چیت کے دوران گراونڈ کی طرف اشارہ کرتے ہوئے کہا کہ اتنی دور سے فٹبال کا میچ تو دیکھا جاسکتا ہے لیکن کرکٹ میں قریب کا ویو ہونا چاہئے ۔

انہوں نے کہا کہ کرکٹ کا پیسہ کرکٹ پر ہی لگے گا، بینکوں میں نہیں رکھا جائے گا، بہت جلد اسٹیڈیم کے اطراف میں ہوٹل کے حوالے سے خوشخبری ملے گی۔

ویسٹ انڈیز کے خلاف تیسرے ٹی ٹوئنٹی میں بھی شکست پر محسن نقوی نے کہا کہ تیسرے میچ میں جیتا ہوا میچ ہارے جس کا دکھ ہے لیکن ہار جیت کھیل کا حصہ ہے، ویمن کرکٹ ٹیم کیلئے مزید کام کرنا ہے، کوچز کی تلاش جاری ہے، ویمنز ٹیم کو وہی اہمیت دی جائے گی جو مینز ٹیم کو دی جاتی ہے ۔