پاکستانی کوہ پیما نائلہ کیانی اگلے ماہ ایک اور اعزاز اپنے نام کرلیں گی

رپورٹ: فیضان لاکھانی۔۔۔ پاکستان کی خاتون کوہ پیماء نائلہ کیانی کی ایک اور اعزاز کی جانب پیش قدمی جاری ہے۔ نائلہ کیانی اگلے ماہ نیپال میں دنیا کی پانچویں بلند چوٹی مکالو کو سر کریں گی۔

مکالو کی اونچائی 8485 میٹر ہے اور یہ ایورسٹ کے جنوب مشرق سے 19 کلو میٹر فاصلے پر ہے۔ نائلہ کیانی 3 مئی کو بیس کیمپ سے مہم کا آغاز کریں گی اور 5 مئی کو ٹاپ پر پہنچیں گی۔

سمٹ مکمل ہونے پر نائلہ کیانی مکالو سر کرنے والی پہلی پاکستانی خاتون بن جائیں گی۔

واضح رہے کہ نائلہ کیانی 8 ہزار میٹر سے بلند دس چوٹیاں سر کرنے والی واحد پاکستانی خاتون ہیں، انہوں نے 2021 گیشربرم ٹو کو سر کرکے اپنے کیرئیر کا آغاز کیا تھا۔

2022 میں کے ٹو اور گیشر برم ون سر کرنے کے بعد نائلہ کیانی نے 2023 میں مزید سات چوٹیاں سر کیں۔ گزشتہ برس نائلہ نے اناپورنا، ایوریسٹ، لوٹسے، نانگا پربت، براڈ پیک ، مناسلو اور چو ایو کو سر کیا تھا۔