کاکول میں کھلاڑیوں کے درمیان رسہ کشی کا مقابلہ، اعظم خان توجہ کا مرکز

کاکول میں پاکستان کرکٹ ٹیم کے فٹنس کیمپ میں کھلاڑیوں کے درمیان رسہ کشی کا مقابلہ ہوا جس میں کپتان بابراعظم کی ٹیم میں اعظم خان توجہ کا مرکز بنے رہے۔

خیال رہے کہ پاکستان کرکٹ ٹیم کا فٹنس کیمپ کاکول میں جاری ہے جہاں کھلاڑی دو سیشنز میں فٹنس کو بہتر بنانے کےلیے ڈرلز کرتے ہیں، کیمپ میں قومی کرکٹرز کے درمیان ٹگ آف وار کا مقابلہ ہوا، شاداب خان نے سوشل میڈیا پر مقابلے کی ویڈیو شیئر کی جو وائرل ہو گئی۔

کپتان بابر اعظم کی ٹیم میں اعظم خان شامل تھے جنہوں نے خوب زور لگایا، ویڈیو کے کیپشن میں شاداب خان نے اعظم خان کی طاقت کی تعریف کرتے ہوئے لکھا ہے کہ کنگ آف اسٹرینتھ، اسی لیے تو بڑے چھکے مارتا ہے۔

علم میں رہے کہ کاکول فٹنس کیمپ 8 کی بجائے اب 7 اپریل کو ختم ہو گا اور اسی روز کرکٹرز کاکول، ایبٹ آباد سے پنڈی پہنچے گے جہاں وہ چیف آف آرمی اسٹاف کی جانب سے دعوت افطار میں شرکت کریں گے اور پھر اپنے اپنے گھروں کو روانہ ہو جائیں گے۔

نیوزی لینڈ کے خلاف سیریز کا آغاز 18 اپریل سے ہو گا۔ منتخب اسکواڈ 14 اپریل کو اسلام آباد میں جمع ہو گا۔