جیولین تھرور محمد یاسر اولمپکس میں کوالیفائی کرنے کیلئے پُراُمید

رپورٹ: سہیل عمران۔۔۔ پاکستان نمبر ٹو ایشین میڈلسٹ جیولین تھرور محمد یاسر اولمپکس میں کوالیفائی کرنے کے لیے پر اُمید ہیں اور کہتے ہیں کہ ان کی خواہش ہے کہ ارشد ندیم کے ہمراہ اولمپکس میں پاکستان کی نمائندگی کروں۔

پنجاب اسٹیڈیم لاہور میں ٹریننگ سیشن کے موقع پر گفتگو کرتے ہو ئے محمدیاسر نے کہا کہ ایشین گیمز اور ایشین چیمپئین شپ کے مقابلے میں اب تیاری بہت اچھی ہے ، میری کوشش ہے کہ پیرس اولمپکس کے لیے کوالیفائی کروں ۔

اپنی بات کو جاری رکھتے ہوئے محمدیاسر نے کہا کہ میں ارشد ندیم کے ساتھ اولمپکس میں پاکستان کی نمائندگی کرنا چاہتا ہوں ، اس کے لیے 30 جون سے قبل زیادہ سے زیادہ ایونٹس میں شرکت کرنا چاہتا ہوں ، فیڈریشن نے یقین دلایا ہے کہ مجھے کوالیفکیشن کا موقع فراہم کیا جائے گا اور کہا ہے کہ میں محنت جاری رکھوں اور بہتر سے بہتر جیولین پھینکوں۔

محمد یاسر نے کہا کہ کوچ فیاض بخاری میرے ساتھ خوب محنت کر رہے ہیں ، میں انفرادی طور پر کوچ کے ہمراہ ٹریننگ کر رہا ہوں کیونکہ پاکستان اسپورٹس بورڈ نے اب تک کوئی کیمپ نہیں لگایا گیا ، اسپورٹس بورڈ نے مجھے کوچنگ سنٹر میں رہائش دی ہو ئی ہے لیکن بین الاقوامی مقابلوں کے لیے کیمپ بھی لگانا چاہیے تاکہ زیادہ سے زیادہ سہولیات میسر ہوں ۔

انہوں نے اس اُمید کا اظہار کیا کہ ابھی تک سب پازیٹو جا رہا ہے اور امید ہے آگے بھی سب اچھا ہو گا۔