عمران نذیر کا ایک بار پھر میدان میں واپس آنے کا فیصلہ

رپورٹ: سہیل عمران۔۔۔ کرکٹر عمران نذیر کرکٹ کے میدانوں میں واپس آگئے اور انہوں نے اب اعلی سطح پر کرکٹ کھیلنے کی ٹھان لی ہے۔

عمران نذیر نے اپنے ٹریننگ سیشن کے موقع پر میڈیا سے گفتگو کرتے ہو ئے کہا کہ میں نے دوبارہ کرکٹ کی طرف واپس آنے کا فیصلہ کیا ہے کرکٹ کھیلنے کے لیے فٹ ہونا بہت ضروری ہے میں اگر فٹنس لیول حاصل کرتا ہوں تو کیوں اعلی سطح پر کرکٹ نہیں کھیل سکتا۔

اپنی بات کو جاری رکھتے ہوئے عمران نذیر نے کہا کہ میں چونکہ بہت عرصہ کرکٹ سے باہر رہا ہوں اس لیے مجھے فٹنس کے لیے تھوڑا وقت لگے گا میں سمجھتا ہوں اورمجھے یقین بھی ہے کہ اگر میں فٹنس اور کرکٹ اسکلز پرایک دو ماہ کام کروں تو اچھی کرکٹ کھیل سکتا ہوں۔

انہوں نے کہا کہ اگر میں دوبارہ صحت مند ہوا ہوں تو پھر مجھے اللہ کھلا بھی سکتا ہےمیں ضرور ایک دن اچھے لیول کی کرکٹ کھیلوں گا۔

عمران نذیر نے بتایا کہ میری سلو پوائزننگ کی گئی اس کے لیے میں کسی کا نام نہیں لوں گا بس ان کے لیے دعا کروں گا میری ری کوری میں بہت ٹائم لگا سات سال بعد کرکٹ کے میدان میں آیا یہ میری زندگی کا ایک ڈراؤنا خواب تھا جسے اب میں بھلا چکا ہوں۔

عمران نذیر نے کہا کہ زندگی اور صحت ملی ہے اس لئے اب دوبارہ کھیلنا شروع کر دیا ہے، میں جاتے جاتے اچھی کرکٹ کھیلنا چاہتا ہوں کیونکہ کرکٹ میرا روزگار ہے۔

انہوں نے کہا کہ میں اپنے بچوں اور نوجوانوں کے لئے انسپائریشن بننا چاہتا ہوں کہ کبھی ہمت نہیں ہارنی چاہیے ہمیشہ ڈٹے رہنا چاہیے جیسے کہ اب میں ڈٹ گیا ہوں کہ مجھے اچھے لیول کی کرکٹ کھیلنا ہے۔

عمران نذیر 8 ٹیسٹ 79 ون ڈے اور 25 ٹی ٹوئنٹی میچ کھیل چکے ہیں، عمران نزیر نے آخری ٹی ٹوئنٹی انٹرنیشنل اکتوبر 2012 میں سری لنکا کے خلاف کھیلا تھا۔