آئی سی سی کا وفد نیشنل اسٹیڈیم کراچی پہنچ گیا

رپورٹ: عتیق الرحمٰن۔۔۔ آئی سی سی چیمپئنز ٹرافی 2025 کی میزبانی پاکستان کے پاس ہے جس کے انتظامات کا جائزہ لینے کیلئے انٹرنیشنل کرکٹ کونسل (آئی سی سی) کا وفد پاکستان پہنچا اور نیشنل اسٹیڈیم کراچی کا دورہ کیا۔

دو رکنی آئی سی سی وفد سینئر منیجر و ایونٹ آپریشنز سارا ایڈگر اور منیجر عون زیدی پر مشتمل تھا جنہوں نے نیشنل بینک اسٹیڈیم کا دورہ کیا اور وہاں انتظامات کا جائزہ لیا۔

پاکستان کرکٹ بورڈ ( پی سی بی) کے سی او سلمان نصیر نے وفد کو بریفنگ دی وفد نے گراونڈ ، ڈرسنگ روم آفیشلز روم میڈیا باکس ،چئیرمین باکس اور گیلری کا تفصیلی جائزہ لیا۔

آئی سی سی وفد میں شامل ہیڈ آف ایونٹ کرس ٹیٹلے کراچی نہیں آئے ممکن ہے وہ راولپنڈی میں ٹیم کو جوائن کریں گے آئی سی سی وفد نے کراچی کے مختلف فائیو اسٹار ہوٹلز کا بھی جائزہ لیا۔

آئی سی سی کا یہ دو رکنی وفد آج شام لاہور روانہ ہوگا جہاں وہ قذافی اسٹیڈیم اور پھر راولپنڈی اسٹیڈیم کا دورہ کرے گا۔