March 23, 2024 | 12:58 pm

رمضان میں لڑکیوں کا نائٹ کرکٹ ٹورنامنٹ

ramzan mein larkiyo ka night cricket tournament
رپورٹ: عتیق الرحمٰن۔۔۔ رمضان کا پہلا عشرہ ختم ہوتے ہی کراچی میں نائٹ کرکٹ کا جنون مزید بڑھ جاتا ہے یہ ہی وجہ ہے کہ اب لڑکوں کے بعد لڑکیوں نے بھی رمضان میں نائٹ کرکٹ کھیلنا شروع کردی ہے۔

کھیلوں کرکٹ کی ایک ایسوسی ایشن نے کراچی میں رمضان ویمنز نائٹ کرکٹ ٹورنامنٹ کا انعقاد کچھی میمن گراؤنڈ میں کیا جس میں کراچی کی سیکنٹروں لڑکیوں نے شرکت کی۔

جیو نیوز سے گفتگو میں گرلز کرکٹرز کا کہنا ہے کہ وہ بھی رمضان نائٹ کرکٹ کھیلنا چاہیتی ہیں اور انجوائے کرنا چاہیتی ہیں۔

لڑکیوں کا کہنا ہے کہ پہلے وہ گھروں میں بیٹھ کر اپنے بھائیوں کو گلیوں محلے میں ہونے والے رمضان کرکٹ کا بہت شور سنتی تھیں اب ان کی باری ہے وہ بھی رمضان کرکٹ کو انجوائے کرنا چاہیتی ہیں۔

خواتین کرکٹرز کا کہنا ہے جب وہ رمضان کرکٹ کی کٹ پہن کر جارہی تھیں تو بھائی کو کہہ کر گئیں تھیں کہ تم سے زیادہ رنز بناؤ گی۔

رمضان ویمنز نائٹ کرکٹ ٹورنامنٹ میں گرلز کرکٹرز کے ساتھ ان کے والدین بھی باہر بیٹھے اپنی بچیوں کو بھرپور سپورٹ کررہے تھے ہر بال پر تالی بجاکر داد دیتے تھے اور خوب انجوائے بھی کررہے تھے۔

کھیلو ںکرکٹ کی سربراہ حدیل عبید کا کہنا تھا کہ کراچی کی رمضان کرکٹ پورے پاکستان میں مقبول ہے لیکن اس رمضان کرکٹ میں ویمنز کہیں موجود نہیں تھیں وہ چاہتی ہیں جس طرح لڑکوں کی رمضان کرکٹ کھیلنے پورے پاکستان کے کھلاڑی کراچی کا رخ کرتے ہیں اس ہی طرح ویمنز نائٹ کرکٹ کو بھی مقبول کریں۔

انہوں نے کہا کہ ابھی تو ٹیپ بال سے آغاز کیا ہے اُمید ہے ہارڈ بال سے بھی رمضان کے ایونٹ کرائیں گے۔

رمضان ویمنز نائٹ کرکٹ ٹورنامنٹ میں 12 ٹیمیں شرکت کررہی ہیں جس میں مجموعی طور پر 15 میچز کھیلے جائیں گےہر میچ کی فی اننگز 5 اوور پر مشتمل ہے ۔

تین روز تک جاری رہے والے ایونٹ کا فائنل کل کھیلا جائے گا فاتح ٹیم کو ایک لاکھ اور رنر اپ کو 50 ہزار روپے کی انعامی رقم ملے گی۔