کھلاڑی انسان ہیں کوئی روبوٹ نہیں کہ ہر دفعہ پرفارمنس دیں: ثمین رانا

رپورٹ: سہیل عمران۔۔۔ لاہور قلندرز کی مسلسل تیسری شکست پر لاہور قلندرز کے سی او او ثمین رانا کا کہنا ہے کھلاڑی انسان ہیں وہ روبوٹ یا مشین نہیں ہیں کہ ہر دفعہ آکر ہر جگہ پرفارمنس دیں۔

جیو نیوز سے گفتگو کرتے ہوئے ثمین رانا نے کہا کہ شاہین آفریدی، حارث رؤف اور زمان خان ورلڈ کلاس کھلاڑی ہیں ان سے توقعات زیادہ ہیں اور توقعات زیادہ ہونے کا کھلاڑیوں کو بھی اندازہ ہے انہیں اسپورٹ کرنے ضرورت ہے۔

اپنی بات کو جاری رکھتے ہوئے ثمین رانا نے کہا کہ ان کھلاڑیوں نے پاکستان اور لاہورقلندرز کے لئے اس لئے خدمات انجام دیں کہ ان میں صلاحیت ہے اور یہ تینوں پاکستان کے نمبرون نمبر ٹو آوٹ اور نمبر تھری بولر ہیں۔

انہوں نے کہا کہ ایک دو میچز یا دو چار سیریز بری ہونے سے کوئی کھلاڑی برا نہیں ہوجاتا اونچ نیچ ہوجاتی ہے اور شکست کے باوجود مثبت چیزیں بھی ہیں صاحبزادہ فرحان نے دو نصف سنچریاں کیں۔

ثمین رانا نے کہا کہ فینز اور ایکسپرٹس پلئیرز کےساتھ پرسنل نہ ہوں پرفارمنس میں تھوڑا مارجن دیں انسانی غلطی ہو جاتی مشین نہیں ہیں جو ہر میچ میں پرفارم کریں۔

لاہور قلندرز کے سی او او نے کہا کہ جہانداد خان نے آل راونڈ پرفارمنس دی رسی وین ڈر ڈسن کی بیٹنگ اچھی رہی حارث روف نے ملتان کے خلاف اچھا اسپیل کیا، ہمارے تینوں میچز کلوز ہوئے جیت سکتے تھے لیکن فیلڈنگ کی وجہ سے مشکلات پیش آئیں۔

ثمین رانا نے کہا کہ توقع تو یہ ہوتی ہے آغاز جیت سے ہو گا لیکن شکست سے ٹیم مضبوط بن کر سامنے آتی ہے اور ہمیں مایوسی نہیں ہے کرکٹ ایک کھیل ہے اور ہم اس کو اسی طرح لیتے ہیں۔

انہوں نے کہا کہ مایوسی تب ہو جب آپ کی ٹیم کوشش نہ کر رہی ہو، تمام کھلاڑی اپنا سو فیصد دینےکی کوشش کر رہے ہیں۔

ثمین رانا نے بتایا کہ سیزن 2020 میں بھی ہمارے ساتھ ایسی صورتحال تھی تین میچز ہارنے کے بعد کراچی میں فائنل کھیلے تھے اور ہمیں اُمید ہے کہ اس مرتبہ کراچی میں فائنل کھیلیں گے اور پرانی شکست کا بدلہ لیں گے۔

انہوں نے کہا کہ راشد خان جیسے کھلاڑی کے ساتھ ٹیم مضبوط ہوجاتی ہے بہرحال میں راشد خان کی عدم دستیابی کو اس طرح لیتا ہوں کہ یہ سلمان فیاض جیسے کھلاڑیوں کے لیے اچھا موقع ہے۔