پی ایس ایل9: اسٹیڈیم کے اندر سیاسی اور مذہبی اظہار کی ہرگز اجازت نہیں

پاکستان سپر لیگ (پی ایس ایل) کے میچز میں بینر لانے کی اجازت دینےیا نہ دینے کے معاملے کو انٹرنیشنل کرکٹ کونسل (آئی سی سی) کے مروجہ قواعدو ضوابط کے تحت دیکھا جا رہا ہے یہی وجہ ہے کہ ٹکٹس پر واضح الفاظ میں قواعد و ضوابط درج ہیں اور بتایا گیا ہے کہ اسٹیڈیم کے اندر سیاسی اور مذہبی اظہار کی اجازت نہیں ہے۔

خیال رہے کہ پی سی بی کرکٹ کی گورننگ باڈی کے تحت کام کرتا ہے اس لیے پی سی بی کو اس کے قوانین کا پابند ہونا پڑتا ہے یہ انٹرنیشنل ایونٹ ہے اس لئے وہی قوانین لاگو ہیں۔

اس حوالے سے ذرائع پی سی بی کا کہنا ہے کہ قواعد و ضوابط آئی سی سی کی جانب سے بنائے گئے ہیں پی سی بی آئی سی سی کے قواعد و ضوابط کے مطابق چلنے کا پابند ہےلہٰذا شائقین کو بھی قوانین کو سمجھنے کی ضرورت ہے۔

واضح رہے کہ حال ہی میں آئی سی سی نے عثمان خواجہ کو فلسطین کے حوالے سے اظہار کی اجازت نہیں دی تھی اور پی ایس ایل کے ایک میچ کے دوران ایک فین کو فلسطین کی آزادی کے حوالے سے بینر لانے کی انتظامیہ کی طرف سے اجازت نہیں دی گئی تھی۔

علم میں رہے کہ ایچ بی ایل پی ایس ایل کے انٹرنیشنل ایونٹ ہونے کی وجہ سے پاکستان کرکٹ بورڈ (پی سی بی) انٹرنیشنل کرکٹ کونسل (آئی سی سی) کے طے کردہ قواعد و ضوابط پر عمل درآمد کرنے کا پابند ہے، پی سی بی نے آئی سی سی کے قوانین پر بورڈ ممبر ہونے کی وجہ سے دستخط کئے ہوئے ہیں۔