پی ایچ ایف: خالد سجاد کھوکھر آؤٹ، طارق بگٹی اِن

رپورٹ: عتیق الرحمٰن۔۔۔ نگراں وزیر اعظم انوار الحق کاکڑ نے پاکستان ہاکی فیڈریشن (پی ایچ ایف) کے نئے صدر کیلئے طارق بگٹی نام کی منظوری دے دی جبکہ خالد سجاد کھوکھر نے صدر کے عہدے سے استعفی دے دیا جس کے بعد پی ایچ ایف کی آئینی اور قانونی دشواریاں ختم ہوگئیں۔

پرائم منسٹر ہاؤس سے منظوری کا نوٹیفکیشن منسٹری آئی پی سی کو موصول ہوگیا اور نگراں وزیر منسٹری آئی پی سی فواد حسین فواد نے پی ایم ہاوس سے ملنے والے نوٹیفیکشن کی تصدیق کردی ہے۔

خیال رہے کہ ہفتہ وار اور 5 فروری کی عام تعطیل ہونے کی وجہ سے پاکستان اسپورٹس بورڈ (پی ایس بی) طارق بگٹی کے نئے صدر کی تقرری کا نوٹیفیکشن منگل کو جاری کرے گی۔

دوسری جانب پی ایچ ایف کے سابق صدر خالد سجاد کھوکھر نے جیو نیوز کو بتایا کہ انہوں نے بطور پی ایچ ایف صدر اپنے عہدے سے استعفی دے دیا ہے انہیں کسی سے کوئی اختلاف نہیں انہوں نے ہاکی کے فروغ کیلئے ایمانداری سے کام کیا ہے۔

واضح رہے کہ خالد سجاد کھوکھر کے مستعی ہونے کے بعد پی ایچ ایف کی آئینی اور قانونی دشوریاں ختم ہوگئی ہے کیونکہ اس سے قبل پاکستان اسپورٹس بورڈ نے طارق بگٹی کو پی ایچ ایف کی ایڈہاک کمیٹی کا سربراہ بناتھا جس کو خالد سجاد کھوکھر نے عدالت میں چیلنج کردیا تھا پھرطارق بگٹی اور خالد سجاد کھوکھر کے درمیان ملاقات ہوئی جس میں طے ہوا کہ خالد سجاد استعفی دے دیں گے، طارق بگٹی نئے صدر کا نوٹیفیکشن ملنے کے بعد پی ایچ ایف کانگریس کا اجلاس بلائیں گے جس میں وہ اعتماد کا ووٹ حاصل کریں گے۔