کوشش کریں گے کل اچھا ٹارگٹ سیٹ کریں: عبد اللہ شفیق

پاکستان ٹیسٹ ٹیم کے اوپننگ بیٹر عبد اللہ شفیق کا کہنا ہے کہ کل ہماری کوشش ہوگی کہ ایک اچھا تارگٹ سیٹ کریں۔

کینبرا میں پرائم منسٹر الیون کے خلاف پہلے دن کے کھیل کے بعد اوپننگ بیٹر عبد اللہ شفیق نے کہا کہ پہلا دن اچھا رہا، شان مسعود اچھا کھیل رہے ہیں ، اچھا اسکور سیٹ کریں گے اور پھر ان کو جلدی آؤٹ کرنے کی کوشش کریں گے۔

اپنی بات کو جاری رکھتے ہوئے عبد اللہ شفیق نے کہا کہ شان مسعود کی کافی اچھی اننگز تھی ہم نے بھی ان کی اننگز سے بحیثیت بیٹر کافی سیکھا ہے۔

 عبد اللہ شفیق نے کہا کہ پرائم منسٹر کے الیون سے کھیل کر ہمیں اچھا موقع ملا ہے اور ہماری تیاری بھی اچھی ہوگئی ہے ، ہم آسٹریلوی ٹیم کے خلاف بہتر کھیل پیش کریں۔

پرائم منسٹر الیون کے خلاف پہلے دن 38 رنز بنا کر آؤٹ ہونے والے بیٹر عبد اللہ شفیق نے کہا کہ جب آپ بیٹنگ میں سیٹ ہوچکے ہوتے ہیں اور آؤٹ ہوجائیں تو افسوس ہوتا ہے مگر کوشش یہی ہے کہ اگلی بار اچھی اننگز کھیلوں جس سے ٹیم کو فائدہ ہو۔

علم میں رہے کہ کینبرا کے مانوکا اوول گراؤنڈ میں پاکستان ٹیم نے پہلے دن کے کھیل کے اختتام پر 6 وکٹوں کے نقصان پر 324 رنز بنا لیے ہیں۔ قومی ٹیم کے کپتان شان مسعود 156 رنز کے ساتھ وکٹ پر موجود ہیں۔