یوگنڈا نے تاریخ رقم کردی، ٹی20 ورلڈکپ کیلئے کوالیفائی کرلیا، زمبابوے آؤٹ

افریقی ملک یوگنڈا کی کرکٹ ٹیم نے تاریخ رقم کرتے ہوئے آئی سی سی ٹی ٹوئنٹی ورلڈ کپ 2024 کےلیے کوالیفائی کرلیا۔

اس حوالے سے آئی سی سی کا کہنا ہے کہ یوگنڈا کی ٹیم ورلڈ کپ کھیلنے والی پانچویں افریقی ٹیم بن جائے گی۔

نمیبیا کے دارالحکومت ونڈہوک میں ورلڈ کپ کوالیفائر افریقہ کے گروپ میچ میں یوگنڈا نے روانڈا کو باآسانی 9 وکٹوں سے ہرادیا۔

روانڈا کی ٹیم پہلے بیٹنگ کرتے ہوئے 65 رنز پر آل آؤٹ ہوگئی۔ ایرک ڈوسنگیزیمانا 19 رنز بنا کر ٹاپ اسکورر رہے۔

یوگنڈا کی ٹیم نے 66 رنز کا ہدف 1 وکٹ کے نقصان پر 9ویں اوور میں پورا کیا۔

واضح رہے کہ یوگنڈا کی روانڈا کے خلاف کامیابی کے بعد زمبابوے کی ٹیم ٹی ٹوئنٹی ورلڈ کپ 2024 کیلئے کوالیفائی کرنے میں ناکام ہوگئی۔

زمبابوے کو میگا ایونٹ میں کوالیفائی کرنے کےلیے یوگنڈا کی شکست کی ضرورت تھی، جو نہ ہوسکی۔

خیال رہے کہ زمبابوے کی ٹیم 2019 اور 2023 ورلڈ کپ کیلئے کوالیفائی کرنے میں ناکام رہی تھی۔