ٹی ٹوئنٹی ٹیم کی قیادت میرے لیے باعث فخر ہے: شاہین آفریدی

فاسٹ بولر شاہین آفریدی ٹی ٹوئنٹی ٹیم کی قیادت ملنے کے بعد پاکستان کرکٹ بورڈ( پی سی بی ) اور شائقین کرکٹ کا شکریہ اداکیا۔

ایکس ( ٹوئٹر ) پر فاسٹ بولر شاہین شاہ آفریدی نے پیغام میں لکھا کہ پاکستان ٹی ٹوئنٹی ٹیم کی قیادت میرے لیے باعث فخر ہے اور میں بہت پرجوش ہوں ، پاکستان کرکٹ بورڈ اور شائقین کے اعتماد اور حمایت کا شکریہ ادا کرتا ہوں۔

انہوں نے لکھا کہ میں ٹیم اسپرٹ کو برقرار رکھنے اور قوم کا نام روشن کرنے کی پوری کوشش کروں گا، ہماری کامیابی اتحاد، اعتماد اور انتھک محنت میں ہے۔

شاہین آفریدی نے مزید لکھا کہ ہم صرف ایک ٹیم نہیں بلکہ ہم ایک فیملی کی طرح ہیں، ہم سب مل کر ایک ساتھ آگے بڑھیں گے۔

واضح رہے کہ گزشتہ روز پاکستان کرکٹ بورڈ (پی سی بی) نے شان مسعود کو ٹیسٹ ٹیم کا کپتان اور شاہین آفریدی کو ٹی ٹوئنٹی ٹیم کا کپتان مقرر کیا ہے جبکہ ون ڈے ٹیم کے کپتان کا اعلان بعد میں کیا جائے گا۔