پہلا سیمی فائنل: کیا بھارت نے آج کے میچ کی پچ تبدیل کردی؟

آئی سی سی کرکٹ ورلڈ کپ کا پہلا سیمی فائنل آج بھارت اور نیوزی لینڈ کے درمیان کھیلا جائے گا اور اس میچ سے قبل بھارتی کرکٹ بورڈ پر میچ کی پچ تبدیل کرنے کا الزام لگ گیا۔

برطانوی میڈیا کے مطابق بی سی سی آئی نے انٹرنیشنل کرکٹ کونسل (آئی سی سی) کی اجازت کے بغیر سیمی فائنل میچ کی پچ تبدیل کی ہے۔

برطانوی میڈیا کے مطابق بھارتی بورڈ نے ورلڈ کپ میں 2 بار استعمال ہونے والی پِچ کو ایک بار پھر استعمال کرنے کا فیصلہ کیا ہے، بھارت نے اسپنرز کے لیے سازگار پِچ کا انتخاب کیا تاکہ ان کے اسپنرز کو مدد مل سکے۔

میڈیا رپورٹ میں کہا گیا ہے کہ ممبئی کے وانکھیڈے اسٹیڈیم میں سیمی فائنل میچ کے لیے پِچ نمبر 7 استعمال ہونی تھی جو پہلے استعمال نہیں ہوئی مگر بھارتی بورڈ نے پچ نمبر 6 کی منظوری دی ہے جس پر پہلے دو میچز ہوچکے ہیں،پچ کی تبدیلی آئی سی سی معاہدے کی خلاف ورزی ہے۔

برطانوی میڈیا کے مطابق خدشہ ہے کہ بی سی سی آئی فائنل میچ کے لیے احمد آباد اسٹیڈیم میں بھی ایسا کر سکتی ہے۔

خیال رہے کہ ریکارڈز کے مطابق بھارت ناک آؤٹ میچز میں آج تک نیوزی لینڈ سے نہیں جیت سکا ہے۔