بابراعظم کے بعد اب کس کو کپتانی کی ذمہ داری سونپی جائے گی؟

آئی سی سی کرکٹ ورلڈ کپ میں بدترین شکست کی وجہ سے قومی ٹیم کے کپتان بابراعظم کو کپتانی سے ہٹائے جانے کا فیصلہ کرلیا گیا ہے۔

اس بارے میں ذرائع کا بتانا ہے کہ بورڈ نے بابر اعظم کو کپتانی سے ہٹانے کا فیصلہ کرلیا ہے اور بابر اعظم بطور کپتان استعفیٰ دیں گے تو بورڈ قبول کر لے گا۔

اسی حوالے سے بابر اعظم کی آج پاکستان کرکٹ بورڈ (پی سی بی) مینجمنٹ کے سربراہ ذکا اشرف سے ملاقات کا امکان ہے۔

واضح رہے کہ اسی سلسلے میں ذکااشرف کی سابق کرکٹرز سے ملاقات بھی ہوئی جس میں یونس خان، سہیل تنویر اور وہاب ریاض نے چیئرمین کو جلد بازی میں تبدیلیاں نہ کرنے کا مشورہ دیا اور کہا کہ ٹی ٹوئنٹی ورلڈ کپ کو مدِنظر رکھ کر پلاننگ کی جائے اور ون ڈے میچز میں ایک سال کا وقفہ کے ابھی اس کی فکر نہ کی جائے۔

ذرائع کے مطابق دورہ آسٹریلیا میں شان مسعود ٹیسٹ کپتان بننے کے مضبوط امیدوار ہیں جبکہ دورہ نیوزی لینڈ میں ٹی 20 ٹیم کی قیادت کےلیے شاہین آفریدی مضبوط امیدوار ہیں۔