September 18, 2023 | 04:06 pm

ہماری ٹیم ایسی نہیں ہے جس طرح وہ ہورہی ہے: جاوید میانداد

humari team esi nahi hai jis tarha wo ho rahi hai javed miandad
رپورٹ: فیضان لاکھانی۔۔۔ پاکستان کرکٹ ٹیم کے سابق کرکٹر جاوید میانداد کا کہنا ہے کہ ہماری ٹیم ایسی نہیں ہے جس طرح وہ ہورہی ہے، غلطیوں سے سبق سیکھنا ہوگا۔

جاوید میانداد نے کہا کہ کرکٹ کو سمجھنا بہت ضروری ہے، بیٹرز کے نمبرز غیر ضروری طور پر نہ تبدیل ہوں اور ہر کسی بیٹسمین کو پتہ ہے کہ فاسٹ بولر یا اسپنر کیا کرسکتا ہے۔

سابق کپتان نے کہا کہ پلیئر کو پتہ ہونا چاہیے کہ بولر کو کیسے فیس کرنا ہے، پریکٹس میں ممکنہ مقابلے کے حساب سے تیاری کریں۔

انہوں نے کہا کہ بھارت میں بھی وہی کرکٹ کھیلنی ہے جو دنیا میں کہیں اور کھیلتے ہیں اور آپ کو ہر کنڈیشن کے مطابق خود کو تیار کرنا ہوتا ہے اور وکٹوں کے حساب سے اپنی اپنی تیاریاں کرنا ہوتی ہے۔

جاوید میانداد نے کہا کہ آپ پروفیشنل پلیئر ہیں، کراوڈ کا پریشر نہ لیں، گیم پر فوکس رکھیں، ورلڈ کپ بھارت میں ہو یا کہیں اور کرکٹ تو بدل نہیں جائے گی۔

اپنی بات کو جاری رکھتے ہوئے میانداد نے کہا کہ اگر ٹیم کچھ نہیں کررہی تو کپتان پر تنقید کیا کریں، فیصلہ سازی کی مہارت تجربے کے ساتھ آتی ہے۔