September 18, 2023 | 02:22 pm

ایشیا کپ کی بُری کارکردگی سے ٹیم کو ڈینٹ پڑا ہے: مصباح الحق

asia cup ki buri karkardigi sae team ko dent para hai misbah ul haq
رپورٹ: عتیق الرحمٰن۔۔۔ پاکستان کرکٹ ٹیم کے سابق کوچ مصباح الحق کا کہنا ہے کہ ایشیا کپ کی بری کارکردگی سے ٹیم کو ڈینٹ پڑا ہے اور ورلڈ کپ سے قبل پاکستان ٹیم کو اس صورتحال سے نکلنا ہوگا۔

سابق کپتان مصباح الحق نے کہا کہ شکست کی تمام ذمہ داری کپتان بابر اعظم پر ڈالنا درست نہیں ہے، آپ کی پوری ٹیم کو شکست ہوئی ہے۔

ایشیا کپ کے سپر فور مرحلے میں بھارت کے ہاتھوں 228 رنز سے شکست کا حوالہ دیتے ہوئے مصباح الحق نے کہا کہ 228 رنز سے شکست صرف کپتان کہ وجہ سے نہیں ہوئی، ان پلیئرز نے ماضی میں بھی پرفارم کرکے دکھایا ہے۔

اپنی بات کو جاری رکھتے ہوئے مصباح الحق نے کہا کہ غلطیاں ہوئی ہیں لیکن یہی ٹیم بہتر ہے اور ہمیں اپنی پرفارمنس بہتر کرنی ہے اور مجھے امید ہے یہی ٹیم بہتر کرے گی۔

مصباح الحق نے کہا کہ پاکستان کا اعتماد ضرور خراب ہوا ہے مگر پاکستان ہمیشہ مشکل حالات سے باہر نکلا ہے۔

انہوں نے کہا کہ ورلڈکپ ایک نیا ایونٹ ہے کنڈیشن مشکل ہوگی مگر بھارت کی کنڈیشنز پاکستان کو سپورٹ کرے گی اور وہاں پاکستانی بیٹنگ کو سپورٹ ملے گی اور پاکستان کےلیے اچھا ہے کہ یہاں پر ایونٹ ہورہا ہے۔

مصباح الحق نے کہا کہ جو خامیاں ہیں سب کے سامنے ہے، ہمارا اسپن ڈیپارٹمنٹ اس طریقے سے پرفارم نہیں کرسکا، کھلاڑیوں میں کمی نہیں ہے،بہتری کی گنجائش ہے۔

اپنی بات کو جاری رکھتے ہوئے سابق کپتان نے کہا کہ یہی شاداب خان تھا جس نے ماضی میں پرفارمنس دی ہے اور یہی ٹیم نمبر ون بھی بنی ہے، اس وقت صورتحال ایسی ہے کہ اب زیادہ تبدیلی نہیں کرسکتے۔

سابق کوچ نے کہا کہ کسی بھی سطح پر تبدیلی کا یہ وقت مناسب نہیں ، ٹیم میں تبدیلی کے حوالے جواب سلیکشن کمیٹی دے گی، اگر زیادہ تبدیلی کریں گے تو ٹیم کا ماحول خراب ہوجائے گا اور ابھی ورلڈ کپ سامنے ہے زیادہ تبدیلی سے گریز کیا جائے۔

مصباح الحق نے کہا کہ مکی آرتھر ٹیم کو چھوڑ کر کیوں گئے سوال نجم سیٹھی سے کریں اور مکی آرتھر اگر انگلینڈ میں بیٹھے ہیں تو یہ سوال نجم سیٹھی سے کرنا چاہیے۔