آسٹریلوی بیٹرز کے لیے گردن کے پروٹیکٹر کا استعمال لازمی قرار

رپورٹ: سہیل عمران۔۔۔ کرکٹ آسٹریلیا نے پلیئنگ کنڈیشنز میں تبدیلیاں کر دیں ہیں جس کے بعد اب آسٹریلوی بیٹرز کے لیے گردن کے پروٹیکٹر کا استعمال لازمی قرار دینے کافیصلہ کیا گیا ہے۔

کرکٹ آسٹریلیا نے انٹرنیشنل اور ڈومیسٹک کرکٹ میں تمام بیٹرز کو ہیلمٹ کے ساتھ گردن پر گیند لگنے سے بچانے والا پروٹیکٹر لازمی پہننے کی ہدایت جاری کی ہے۔

واضح رہے کہ نئے قانون کا اطلاق یکم اکتوبر سے ہو گا اور نئے قانون کی خلاف ورزی کرنے والے کھلاڑیوں پر جرمانہ عائد کیا جائے گا۔

خیال رہے کہ کرکٹ آسٹریلیا کے اس فیصلے سے متعدد کھلاڑی متاثر ہوں گے کیونکہ عثمان خواجہ ، ڈیوڈ وارنر اور اسٹیو اسمتھ اس سے پہلے ہیلمٹ کے ساتھ پروٹیکٹر استعمال کرنے سے انکار کر چکے ہیں۔

جبکہ ان تینوں کرکٹرز کے علاوہ موجودہ وائٹ بال کے آسٹریلوی اسکواڈ میں ٹم ڈیوڈ، جوش انگلس بھی حفاظتی پروٹیکٹر کا استعمال نہیں کرتے۔

علم میں رہے کہ کرکٹ آسٹریلیا نے حفاظتی پروٹیکٹر سمیت نئے سیزن کے پلیئنگ کنڈیشنز کے لیے 12 تبدیلیاں کی ہیں۔

خیال رہے کہ کرکٹ آسٹریلیا نے فل ہیوز کے انتقال کے بعد ہیلمٹ کے ساتھ پروٹیکٹر کے استعمال کی تجویز دی تھی کیونکہ فل ہیوز کی ڈومیسٹک میچ کے دوران گردن پر گیند لگنے سے موت واقع ہوئی تھی۔