ایشیا کپ: سری لنکا کیخلاف آج کون سے کھلاڑی میدان میں اُتریں گے؟

ایشیا کپ سپر فور مرحلے میں سیمی فائنل کی حیثیت اختیار کرنے والا میچ آج پاکستان اور سری لنکا کے درمیان کولمبو کے پریماداسا کرکٹ اسٹیڈیم میں کھیلا جائے گا۔

آج کے اس اہم میچ میں پاکستان ٹیم نے پانچ تبدیلیوں کے ساتھ ٹیم کا اعلان کر دیا ہے، ٹیم میں محمد حارث، سعود شکیل، محمد نواز، محمد وسیم جونیئر اور زمان خان شامل ہیں جبکہ فخر زمان، سلمان علی آغا، فہیم اشرف، نسیم شاہ اور حارث رؤف شامل نہیں۔

علم میں رہے کہ یہ زمان خان کا ون ڈے انٹرنیشنل ڈیبیو ہوگا،انہیں نسیم شاہ کی جگہ ایشیا کپ اسکواڈ میں شامل کیا گیا ہے جبکہ سلمان علی آغا، نسیم شاہ اور حارث رؤف انجری کے باعث ٹیم میں شامل نہیں ہیں۔

پاکستان کی جانب سے آج کے اہم میچ میں پلیئنگ الیون بابراعظم کی قیادت میں محمد حارث، امام الحق، وکٹ کیپر بیٹر محمد رضوان اور سعود شکیل شامل ہیں۔

ان کے علاوہ دیگر کھلاڑیوں میں افتخار احمد، شاداب خان، محمد نواز، شاہین آفریدی، محمد وسیم اور زمان خان میدان میں اتریں گے۔

واضح رہےکہ آج کے میچ کی فاتح ٹیم اتوار کو بھارت کے خلاف ایونٹ کا فائنل کھیلے گی، اور اگر میچ بارش کی نذر ہوگیا تو دونوں ٹیموں کو ایک، ایک پوائنٹ ملے گا اور دونوں ٹیموں کے تین، تین پوائنٹس ہوجائیں گے مگر بہتر رن ریٹ ہونے کی وجہ سے سری لنکا فائنل میں پہنچ جائے گا۔