June 01, 2023 | 11:22 am

پی سی بی نے آئی سی سی کو ورلڈ کپ میں شرکت کیلئے اپنا موقف پیش کردیا

pcb nay icc ko worldcup mien shirkat kay liyw apna moakaf paish kardia
رپورٹ: سہیل عمران۔۔۔ انٹرنیشنل کرکٹ کونسل ( آئی سی سی) کے اعلیٰ عہدیداران چیئرمین گریگ بارکلے اور چیف ایگزیکٹو جیف ایلرڈائس پاکستان کے دو روزہ دورہ کے بعد لاہور سے دبئی کے لیے روانہ ہوگئے۔

آئی سی سی کے اعلیٰ عہدیداروں سے ملاقات کے بارے میں ذرائع کا بتانا ہے کہ پی سی بی نے ورلڈ کپ میں شرکت کے حوالے سے اپنا بھرپور موقف پیش کیا اور پاکستان نے بھارت کے رویے پر کھل کر بات کی۔

ذرائع نے یہ بھی بتایا کہ پاکستان نے آئی سی سی کو بھارت میں ورلڈ کپ میں شرکت کی یقین دہانی نہیں کرائی بلکہ پی سی بی نے بھارت میں ورلڈ کپ میں شرکت کو حکومتی اجازت سے مشروط قرار دیا ہے۔

ذرائع نے مزید اندر کا احوال بتاتے ہوئے کہا کہ پاکستان نے چیمپئنز ٹرافی میں بھارتی کرکٹ کی آمد کی ضمانت مانگی ہے اور آئی سی سی کو پیغام دیا کہ بھارت ایشیا کپ کے حوالے سے لچک دکھائے گا تو مستقبل میں پاکستان بھی دکھا سکتا ہے، پی سی بی نے ورلڈ کپ وینیوز پر تحفظات کا اظہار کیا ہے۔

ذرائع کے مطابق پی سی بی نے فنانشل ماڈل میں کم ریونیو شئیرنگ پر بھی سوالات اٹھائے ہیں، آئی سی سی نے اس معاملے کا جائزہ لینے کی یقین دہانی کرائی ہے۔

علم میں رہے کہ آئی سی سی کے عہدیداران نے اہم دورے میں دو مصروف دن گزارے جس میں انہوں نے میٹنگز کے علاوہ تاریخی مقامات اور سیف سٹی اتھارٹی کا دورہ بھی کیا۔

سیف سٹی اتھارٹی کے دورے کے موقع پر سیکورٹی کے حوالے سے کیے جانے والے انتظامات کو آئی سی سی نے سراہا، عہدیداران کو ٹیموں کی آمدو رفت پر بریفنگ بھی دی گئی۔