June 01, 2023 | 08:37 am

ہاکی ایشیا کپ: پاکستان فائنل میں، آج روایتی حریف سے آمنا سامنا ہوگا

hockey pakistan aj riwaieti haref sae samna kary ga
اومان کے شہر صلالہ میں کھیلے گئے جونیئر ایشیا کپ ہاکی کے سیمی فائنل میں پاکستان نے ملائیشیا کو دو کے مقابلے میں چھ گول سے شکست دے کر فائنل کے لیے کوالیفائی کرلیا، پاکستان نے مسلسل تیسری اور مجموعی طور پر ساتویں بار ٹورنامنٹ فائنل کیلئے کوالیفائی کیا ہے۔

پاکستان کی جانب سے عبدالرحمن نے شاندار پرفارمنس کا مظاہرہ کیا، شرٹ نمبر 18 عبدالرحمن نے میچ میں تین گول اسکور کئے ۔

مخالف ٹیم ملائشیا کے پیرابو تنگراجا نے 21 ویں منٹ میں گول کرکے برتری حاصل کی مگر کھیل کے 42 ویں منٹ میں پاکستان کے محمد صفیان نے گول کرکے مقابلہ برابر کردیا اور کھیل کے 44 ویں منٹ میں عبدالرحمٰن نے پاکستان کو برتری دلائی مگر فوراََ ہی اگلے منٹ ملائیشیا نے مقابلہ پھر 2-2سے برابر کیا۔

میچ کے 47 ویں منٹ میں عبدالحنان شاہد نے فیلڈ گول کرکے پاکستان کو پھر برتری دلادی، پھر 48 اور 51 ویں منٹ میں عبدالرحمٰن نے دو گول کرکے پاکستان کی برتری مستحکم کردی۔

میچ کے اختتام سے دو منٹ قبل ارباز احمد نے پاکستان کے لیے چھٹا گول کردیا اور یوں میچ اسی اسکور پر ختم ہوا۔

واضح رہے کہ پاکستان نے مسلسل تیسری اور مجموعی طور پر ساتویں مرتبہ جونیئر ایشیا کپ کے فائنل کیلئے کوالیفائی کیا ہے جہاں آج اس کا مقابلہ روایتی حریف بھارت سے ہوگا۔