May 29, 2023 | 10:26 am

اولمپئین بسمہ خان بہترین سوئمر قرار

olympian bisma khan bejtareen swimmer qarar
رپورٹ: سہیل عمران۔۔۔ نیشنل گیمز کے سوئمنگ ایونٹ میں آرمی کی بسمہ خان بہترین سوئمر قرار پائیں ۔

سوئمنگ کا ایونٹ لاہور کے نشترک پارک اسپورٹس کمپلیکس میں منعقد ہوا جس میں آرمی کی سوئمرز چھائیں رہیں ۔ آرمی نے 16 گولڈ ، سات سلور اور تین برانز میڈلز کے ساتھ پہلی پوزیشن حاصل کی ۔ آرمی کی بسمہ خان کو بہترین سوئمر قرار دیا گیا انہوں نے 5 انفرادی اور تین ریلے گولڈ میڈلز جیتے ۔

اولمپئین بسمہ خان نے جیو نیوز سے خصوصی گفتگو کرتے ہو ئے کہا کہ میں نے سوچا ہوا تھا کہ مجھے بہترین سوئمر قرار پانا ہے ۔ تیاری اچھی تھی پہلے نیشنل چیمپئین شپ ہوئی تو تیاری کا اچھا موقع مل گیا تھا، نیشنل گیمز میں ٹیم کا ساتھ بھی تھا اس لیے توقع کے مطابق کامیابی ملی اور ٹیم نے بھی ٹائٹل جیتا۔

بسمہ خان نے کہا کہ ٹیم کے لیے میں نے اپنے بنیادی ایونٹس میں شرکت نہیں کی ، آرمی کو جتوانا تھا اس لیے ٹیم کی خاطر دوسرے ایونٹس میں شرکت کی لیکن میں خوش ہوں کہ ہماری ٹیم نے سب سے زیادہ میڈلز جیتے ہیں ۔

بسمہ خان نے کہا کہ ورلڈ سوئمنگ چیمپئین شپ کے لیے سخت محنت کر رہی ہوں ، یہ اولمپک کوالیفائنگ راونڈ بھی ہے ، کوشش کروں گی کہ اچھی کارکردگی کا مظاہرہ کروں اور پھر ایشین گیمز کا سوچوں گی ۔