ورلڈ کپ، ایشیا کپ: پاک، بھارت میچز کے حوالے سے اہم پیش رفت

رپورٹ: سہیل عمران۔۔۔ ایشیا کپ 2023 میں پاکستان نے دو ممالک میں ایشیا کپ کرانے کی تجویز دی ہےجس میں بھارت کے میچز پاکستان کے علاوہ کسی اور ملک میں کھیلنے کی تجویز ہے۔

اس بارے میں بھارتی بورڈ آفیشل کا کہنا ہے کہ ایشین کرکٹ کونسل ایشیا کپ کے دو ممالک میں انعقاد پر غور نہیں کرے گا کیونکہ دو ممالک میں ایونٹ کا انعقاد مالی طورپر ممکن نہیں

بھارتی بورڈ آفیشل کے مطابق دو ممالک میں ایونٹ کرانے سے بجٹ بڑھ جائے گا اور اے سی سی زیادہ بجٹ کی منظوری نہیں دے گی۔

بھارتی بورڈ کا کہنا ہے کہ اگر اے سی سی کہتا ہے کہ بجٹ بڑھ جائے گا تو پھر پاکستان اپنے میچز اپنے ملک میں کیسے کھیل سکتا ہے ہمیں پاکستان میں ایشیا کپ کے انعقاد پر تحفظات ہیں۔

بھارتی بورڈ کا یہ بھی کہنا ہے کہ بھارتی بورڈ پاکستان نہ جانے کے فیصلے پر قائم ہے لہٰذا ایشیا کپ کا انعقاد یو اے ای یا قطر میں ہوناہے اور پاکستان کو بھی اپنے میچز ان دو ممالک میں سے ایک میں کھیلنا پڑیں گے۔

بھارتی میڈیا کے مطابق بھارتی بورڈ کے خیال میں ایشیا کپ کا میزبان پاکستان مکمل ایونٹ کرانے کے لیے دباؤ ڈال رہا ہے۔

واضح رہے کہ ایشیا کپ کے دو ممالک میں انعقاد کے فارمولے پر بات چیت کی جا رہی ہے۔

دوسری جانب بھارتی میڈیا کا یہ بھی کہنا ہے کہ ورلڈ کپ 2023 سے متعلق انٹرنیشنل کرکٹ کونسل ( آئی سی سی) نے ورلڈ کپ میں پاکستان کے میچز بھارت کے علاوہ کسی اور ملک میں کرانے کا انکار کردیا ہے۔

بھارتی میڈیا کے مطابق یہ ایک مضحکہ خیز تجویز ہے پاکستان اگر سیمی فائنل یا فائنل میں پہنچتا ہے تو ورلڈکپ کے وینیوز کبھی تبدیل نہیں ہوں گے۔

علم میں رہے کہ بھارت میں ہونے والے ورلڈکپ میں پاکستان کے میچز بنگلہ دیش میں کرانے کی خبریں سامنے آئیں تھیں۔