ارشد ندیم نے ورلڈ ایتھلیٹکس چیمپئین شپ کیلئے اپنا ہدف بتا دیا

رپورٹ: سہیل عمران۔۔۔ اولمپئین جیولین تھرور ارشد ندیم نے ورلڈ ایتھلیٹکس چیمپئین شپ میں میڈل کو ہدف قرار دے دیا ہے ۔ اولمپئین ارشد ندیم گھٹنے اور کہنی کی سرجری کے بعد ان دنوں اپنے ری ہیب کے آخری مراحل میں ہیں۔

اولمپئین ارشد ندیم نے جیو نیوز سے گفتگو میں کہا کہ رمضان المبارک میں ری ہیب بھی ساتھ ساتھ جاری ہے ، پہلے سے بہت بہتر محسوس کر رہا ہوں جونہی میرا ری ہیب مکمل ہو گا تو میں باقاعدہ بھرپور ٹریننگ کا آغاز کر دوں گا۔

ارشد ندیم نے کہا کہ اس سال اہم ایونٹس آ رہے ہیں اور آئندہ برس پیرس اولمپکس بھی ہیں ان کے لیے میں نے بھرپور ٹریننگ کرنا ہے جولائی میں ورلڈ ایتھلیٹکس کے مقابلے ہیں ، اس کے بعد ایشین گیمز ہیں اور آئندہ برس پیرس اولمپکس کا انعقاد ہے ، اس وقت میرا ہدف ورلڈ ایتھلیٹکس چیمپئین شپ ہے ، میں نے اس ایونٹ میں اپنی بہترین کارکردگی کا مظاہرہ کرنا ہے اور میڈل جیتنا ہے۔

اولمپئین جیولین تھرورکا کہنا ہے کہ میری کہنی اور گھٹنے کا مسئلہ پرانا چلا آ رہا تھا ، گھٹنے کی تکلیف چھ سات سال سے تھی جبکہ کہنی کی تکلیف کا شکار میں تین سال سے تھا میں ایونٹس میں حصہ لیتا رہا لیکن مجھے مشکل پیش آ رہی تھی۔

اپنی بات کو جاری رکھتے ہوئے ارشد ندیم نے کہا کہ ابھی میرے پاس وقت تھا تو پھر میں نے سرجری کرائی اب بہتر ہوں ، میرا پاکستان میں ہی ری ہیب جاری ہے ، یہاں مسئلہ تو ہے کیونکہ یہاں ورلڈ لیول کی سہولیات نہیں ہیں لیکن پھر بھی شکر ہے سب اچھا جا رہا ہے ۔

انہوں نے بتایا کہ ڈاکٹر اسد عباس کی نگرانی میں ری ہیب کر رہا ہوں ، ڈاکٹر علی باجوہ جو انگلینڈ میں ہوتے ہیں اور جنہوں نے میری سرجری کی ہے ان کے ساتھ ویڈیو کال کے زریعے رابطہ میں ہوتے ہیں۔

اولمپئین ارشد ندیم نے کہا کہ کامن ویلتھ گیمز میں ریکارڈ 90٫18 میٹر تھرو کی اگر میں اسی طرح تھرو کرتا ہوں تو آئندہ ایونٹس میں بھی میرے میڈل جیتنے کے امکانات روشن ہیں ۔